Еркем-ай

Еркем-ай (1-нұсқа)

Айт дегенде өлеңді аңырмаймын, Көлден ұшқан аққудай мамырлаймын.

Қайырмасы: Еркем-ай, Бүгін болған мерекең Болсын тағы ертең-ай.

Қайда жүрсем жақсының жанындамын, Іздегенмен жаманға табылмаймын.

Қайырмасы:

Әншілердің серігі домбыра ма?! Тарта берсең, домбыра болдыра ма?!

Қайырмасы:

Домбыраны баппенен қолға алып, Шарықтата әнге сал оң бұра да.

Қайырмасы: Еркем-ай, Бүгінгі күнің тамаша, Ертең бұдан көркем-ай, Еркем-ай, Бүгін болған тамаша, Болсын тағы ертең-ай.

Еркем-ай (2-нұсқа)

Біздің ауыл Ақсайдың қақпасында, жан сәулем. Күміс жүген жарқылдар ат басында, еркем-ай. Шыныменен көңілің болса бізде, Шапан-ішік жамылып жат қасымда, еркем-ай.

Ай қараңғы, кеш жарық, Ебін тауып келсеңші-ай.

Іле деймін, ендеше Іле деймін, жан сәулем. Өте шықсам Іледен міне деймін, еркем-ай. Кісі жары кісіге жар болмайды, Өз жарыңның тілеуін тіле деймін, еркем-ай.

Ай болмаса, жұлдыз бар, Ебін тауып келсеңші-ай.

Еркем-ай (3-нұсқа)

Көк үліңгі, жаным-ау, көк үліңгі, Өлең айтып көтерші көңіліңді, еркем-ай. “Әйел жолы жіңішке” деген сөз бар, Ойла, жаным, өзіңнің өміріңді, еркем-ай.

Сылдырлаған шашбаулы, Жүзі жарқын көркем-ай.

Тал мен қайың, құрбым-ау, тал мен қайың, Саулық барда білмейсің ауру жайын, еркем-ай. Қамшы саптай қысқа бұл тіршілікте, Ағызайық көмей мен тілдің майын, еркем-ай.

Сылдырлаған шашбаулы, Жүзі жарқын көркем-ай.

Еркем-ай (4-нұсқа)

Адамнан артық ажар, ақыл айлаң, Ажары ақ бетіңнен асқан айдан, Адасқан аққу құстай болдым асық, Айдындай ақ төсіме асылшы, айнам.

Еркем-ай, Еркем-ай, Би билесіп, ән шырқау, Қызықтың ай-ай, қызығы-ай.

Аққу құс айдын көлде шомылғандай, Лашын құс өз бойына қорынғандай. Әніндей домбыраның дүрілдетіп, Көк тұйғын қуға түсіп шошынғандай.

Еркем-ай, Еркем-ай, Би билесіп, ән шырқау, Қызықтың ай-ай, қызығы-ай.

Еркем-ай (5-нұсқа)

Ер болмас белін жалпақ буғанменен, Тазармас нағыз қара жуғанменен. Беу, еркем-ай!

Байқасаң ақыл басқа, ажар басқа, Пайда жоқ құр әдемі туғанменен. Беу, еркем-ай!

Жылқы сайға тұра алмас қыс келгенде, Жер шандыаяқ тартады ел келгенде. Беу, еркем-ай!

Ауыздағы жел сөзді аяйым ба, Бүгежектеп отырмын сөз келгенде. Беу, еркем-ай!

Жоғарыдағы бес нұсқаның бәрі ander.kz сайтынан көшіріліп алынды.

Еркем-ай Нотасы (1-нұсқа) [1]

Еркем-ай Нотасы (2-нұсқа) [2]

Еркем-ай Нотасы (3-нұсқа) [3]

Сандық Нота. 4-бет (2022)

Домбыра ойнау оңай ма? (Қосымша әдістемелік құрал) 43-бет ІSBN 978-601-209-204-2 (2013)

Сандық Ноталар Жинағы. 5-бет